"Aurreko urteetan oso harrera ona izan duten ekitaldiak izan dira eta espero dugu aurten ere horrela izatea", azaldu du Ugalde zuzendariak. Bergarako musika eskolaren nahia herritarrei eta ikasleei gauza berriak eta interesgarriak erakustea dela gaineratu du Ugaldek.
Nobedadea, Santiago banda
Domekan hasiko dira emanaldiekin. Lehenengoa Elgoibarren izango da; hain zuzen, akordeoi topaketa.
Aurtengo nobedadea, hilaren 11n, Santiago bandak emango duen kontzertua izango da. Organo kontzertu didaktikoa izango da eta Santa Marina Parrokian eskainiko dute, arratsaldeko 6etan. Hilaren 12an, musika eskolako ikasleen eskutik musika barrokoaz gozatzeko aukera izango da. Andoni Sierraren zuzendaritzapean, Mariaren Lagundiko elizan arituko dira ikasleak, iluntzeko 8etan.
Gainera, Ander Arroitajauregi luthierraren eskutik sokazko instrumentuak nola egiten diren ikasteko aukera egongo da. Hori apirilaren 14an izango da.
Saio guztiak doan
Hilaren 25a arte iraungo dute Apirilean musika saioek. Aipatutako emanaldiez gain, besteak beste, ipuin musikala, musikoterapia tailerra eta ahotsaren eguna antolatu dituzte.
Aipatu, saio guztiak doan izango direla. Hala ere, musika eskolan sarrera eskatu beharko da hainbat saioetarako.