Greanpeacek Espainiako estatuko kutsadura iturrien azterketaren gainean egindako txostenaren arabera, Euskal Autonomia Erkidegoko fabrikek, gainontzeko Autonomia Erkidegoetakoek baino gehiago kutsatzen dute. Guztira Hego Euskal Herrian, 26 puntu beltz atzeman dituzte; hamahiru Gipuzkoan, hamar Bizkaian, bi Araban eta bat Nafarroan. Hiru sektore aztertu ditu Greenpeacek; industria produkzioa, hiri hondakinen isuria eta tratamendua eta hidrokarburoak.
Gune kutsagarri horietatik gehienak metalgintza-enpresak eta paper fabrikak dira. Greenpeacen txostenaren arabera, puntu beltz horietatik bakarra dago Debagoienean, atzean ikusi dezakezuen Bergarako Arcelor enpresa, hain zuzen ere.
Talde ekologistak adierazi du, isuri kutsagarrien edota hondakinen kudeaketa txarra bada ere, administrazioak ez dituela behar bezalako neurriak hartzen eta gainera permisiboegia dela. Hori horrela, kanpaina bat ipini dute martxan, eta itsasontzi batekin, eta kostatik, puntu beltz edota kutsagarrienak dauden guneak seinalatuko dituzte.
Greenpeacen txostenak dio kutsadura iturrien edota puntu beltz horien kopuruak eta minbizien kasuek zerikusi zuzena dutela. Izan ere, langile batzuek disolbatzaileak, nikela, pestizidak edota hidrokarburoak dituzten produktuekin harremanetan egotea Euskal Autonomia Erkidegoan dauden minbizi kasuen erantzule dela esan du. Hala, txostenaren arabera, aztertutako gainontzeko autonomia erkidegoetan baino handiagoa da Hego euskal herrian, pankreaseko, entzefaloko, Mielomako, ahoko eta zintzurreko minbizia.