Orain arte kultura etxean egin izan dute erakusketa hori, urtero; aurten, baina, KZgunekoak daude kultura etxeko areto horretan, eta, hori dela-eta, udaletxean jarri behar izan dute.
Pintura erakusketan 5 eta 13 urte bitartekoen lanak daude. Horien gaiei dagokienez, denetarik dago: txikienek eurei egokitutakoak egin dituzte; esaterako, animaliak. Eta gainerakoek, konplikatuagoak, hala nola natura hilak eta paisaiak. Alberdik esan du ikasturtean egindakoak direla: "Zapatu goizetan egiten dituzte margoak; normalean, bizpahiru hilabete ematen dituzte bat margotzen".
Zapatuan, marrazki tailerra
Erakusketak irauten duen bitartean, ikasleek hainbat ekimen egingo dituzte: zapatu eguerdian, esaterako, marrazkiak egingo dituzte osoko bilkuren aretoan.
Udako ikastaroan izena eman daiteke
Bestalde, Alberdik gogorarazi du dagoeneko izena eman daitekeela Beartek uztailerako umeendako gertatu duen ikastaroan. Hilaren 30ean amaitzen da izena emateko epea. Astelehenetik egubakoitzera izango dira eskolak.