Alkate aukeraketa
Lau urtean behin egin den bezala, 1977 urtetik aurrera, aurten ere Angiozar bailarako Batzarra aukeratzea tokatzen da. Angiozar bailarako Batzarra aukeratzeko hauteskundeak bereziak dira. Izan ere, Angiozarren bizi edo erroldatuta dauden 18 urtetik gorako pertsona guztiek esku har dezakete hauteskundeetan, eta edonor izan daiteke aukeratua. Hau da, edonork gustuko duenari bere botoa emateko aukera du. Era berean, auzo bakoitzeko ordezkariak ere aukeratzen dira.
Boto emaile bakoitzak lau pertsona aukeratu beharko ditu; alkatetzarako bat eta auzo batzarrerako beste hiru. Batzar horretan ordezkaritza izango dute Asentzio, Goimendi, Zabaletamendi, Mainddao, Parteitxi, Azkuneta eta Errekaldek, bi ordezkariekin bakoitzak.
Alkatea jende aurrean aldarrikatzen da San Migeletan egiten den ekintzan. Ekitaldian alkate berriari aginte makila ematen diote bere ardurak gogoraraziz.
AHTren gaineko galdeketa
Era berean Angiozarko bizilagunek AHT proiektu erraldoiaren gaineko iritzia emateko aukera izango dute uztailaren 1ean. Izan ere, Angiozarren AHTren inguruko erreferenduma egingo dute domekan.
Abiadura Handiko Trenaren lanak hasteko daude zenbait lekutan eta oraindik ez dakite Angiozarko bizilagunek zelako eragina izango duen trenak bertan. Hainbat baserri arriskuan daude. Herri galdeketaren bitartez Angiozarko bizilagunek proiektuarekiko duten iritzia erakutsiko dute.