Bergara eta Azkoitiko Udalek jarritako autobusak topera helduz zihoazen bitartean, taldetxoak oinez zihoazen, eta antolatzaileek propio prestatutako aparkalekuak goraino bete ziren.
Hamabiak ingururako, giro bikaina zegoen ferian. Euskal Herriko hainbat tokitako jendea erruz zebilen Elosun, urtero moduan, ganadu, artisautza eta musikaz gozatzen.
Ganadu-saltzaileak
Ganadu mota asko zegoen Euskal Herriko feria zaharrenetakoan: behiak, ardiak, zaldiak, astoak, idiak…
Jose Luis Senperena Goiatzeko ganadu-saltzailearekin izan ginen hizketan. Hirugarren urtez bisitatzen zuen feria eta, berak esan zigunaren arabera, aurtengoan ganadu gutxiago sumatzen zuen arren, giro aparta eta eguraldia alde izatea azpimarratzen zituen.
Azkoitiar bat bultzatzaile
Lehenengoz, orain 29 urte ospatu zen feria hori Elosun. Azkoitiar bat izan zen antolatzaileetako bat; bergararrei ideiaren berri emandakoan, barrez erantzun zioten, arrakastarik izango ez zuela sinistuta; baina gero, askok lagundu zuten.