Jone, Gika eta Sara. Horiek dira zapatuan, Bergarako Aroztegi aretoan 8 eta 12 urte bitarteko ume eta gaztetxoendako eskaini zuten ikuskizuneko protagonisten izenak. Bullying-aren eta arrazakeriaren gaineko antzezlana, Bergarako Udalak antolatu zuen eta Baketik zentroko antzerki taldeak eskaini zuen emanaldia.
Gaur egun pil-pilean dauden bi gaiok aurkeztu zituzten Olatz Gorrotxategi eta Roberto Ferro aktoreek. Eta ikusle gazteek ez zuten inongo arazorik izan istorioa ulertzeko; aroztegi aretoan bildu ziren 40 neska-mutilek, adi adi entzun eta ikusi zuten aurkeztu zitzaiena.
Parte hartzea handia
Baina bertaratu zirenak ez ziren antzezlan bat ikustera soilik joan. Izan ere, horren ostean, antzerki foroa deritzon eta umeen parte hartzea bultzatzen zuen emanaldia zuten prestatuta. Antzezlaneko istorioak amaiera tragikoa zuela-eta (Sarak bullying-a jasaten du ikaskideengandik eta gora-behera askoren ostean, aldamio batetik erori eta hanka apurtuta amaitzen du), ikusle gaztetxoei istorioak amaiera zoriontsuago bat izan zezan proposamenak egiteko eskatu zieten. Ondoren, proposamenak hartu eta umeek antzeztu zituzten amaiera zoriontsuok. Ikusle guztiak ere hunkituta ikusi genituela antzezlanaren amaieran; istorioak lortu zuen helburua, beraz.