Gaztetxean egindako perkusio eta txalaparta tailerrarekin abiarazi zuten Aniztasun Eguna. Artatse elkartean zen hurrengo hitzordua: herri bazkaria. Eta horixe izan zen, hain justu, arrakasta handiena izan zuten ekintzetako bat: 70 bat pertsona batu ziren.
Ezohiko zaporeak
Egunak agintzen zuen moduan, berezia izan zen egun horretako bazkaria, noski: senegaldarrek arroza arrainarekin prestatu zuten eta pakistandarrek oilaskoa saltsa pikante batekin. Horixe izan zen menua eta gustura jan zuten bertan batutakoek. Baina bada beste arrazoi bat gehiago bazkari berezia izan zela esateko: bukaera aldera arte ez ziren eseri. Izan ere, zutik egin zituzten mokadurik gehienak, elkar ezagutu, mugak apurtu eta harremanak sendotzeko helburuarekin.
Euskal eta afrikar doinuak
Nahasketa platerean, eta nahasketa musikan, arratsalde-iluntze partean trikitiak eta Afrikako perkusioek bat egin zutelako herriko kaleetan. Musikariek bikain uztartu zituzten etxeko eta atzerriko instrumentuak, eta bergararrek gozatu egin zuten emaitzarekin. Herriko plazatik abiatu ziren eta geldialdiak egin zituzten, besteak beste, Domingo Iralan eta Simon Arrietan; eta bergararrek dantzan egin zuten.
Senegal, Pakistan, Maroko, Txile edo Holandako jendeak parte hartu du, toki horietako eta gehiagotako jendea bizi delako herrian. Errealitate hori plazaratu nahi izan dute bultzatzaileek, kanpotik etorritako eta bertan jaiotakoen arteko harremanak sortzeko. Aurreikuspenak bete egin dira eta udal ordezkariak pozik daude oso emaitzarekin.