Alderdi sozialistak asteburuetan udaltzain brigada jartzeko eskaera egin dio Udalari

Alderdi sozialistak tabernen itxiera orduak bete arazteko eta asteburuetan brigada berezia ipintzeko eskatu dio udal gobernuari. Bergara, asteburuetan ‘araurik gabeko herria’ dela esan dute. Agurne Barruso alkateak harriduraz hartu ditu salaketa horiek. Esan du alkate denetik hiru salaketa besterik ez dituztela jaso udaletxean.

Bergarako sozialistak arduratuta daude asteburuetan erdiguneko kaleetan sortzen diren arazoekin. Zarata eta zikinkeria handia egoten dela diote. Udalak, gainera, ez omen die jaramonik egiten herritarrek ipinitako salaketei. “Onartezina da. Herritar batzuk ezin dute gauean lorik egin eta goizean zikinkeriaz beterik aurkitzen dute etxeko ataria", esan du Mari Carmen Barrenetxea sozialistak. "Pixa eta gorakoak aurkitzen dituzte etxeko atarian. Oraindik ere onartezinagoa da behin eta berriz udaletxean salaketak ipini eta inork kasurik ez egitea. Udalaren isiltasuna salatzekoa da”. Bergarako sozialistak gauetan brigada bereziak jartzeko eskaera egin dio Udalari. “Egoerari irtenbide bat emateko Udalari eskatzen diogu beharrezkoak diren neurriak hartzeko", adierazi du Barrenetxeak. "Gauetan udaltzain brigada bat ipini behar du, gehienbat asteburuetan”.

Alkatea harriduraz
Agurne Barruso alkateak harriduraz hartu ditu sozialistek egindako salaketak. Aurreratu du Udalak ez duela asteburuko brigada ipintzeko asmorik. "Iruditzen zaitu herritarren kezka justu kontrakoa dela, Bergaran giroa jaisten ari dela bai egunez bai gauez", esan du. "Alkatetzara iritsi ginenetik gai honekin lotuta hiru salaketa jaso ditugu udaletxean. Hortik esatea Bergara 'araurik gabeko hiria dela' ez zait ez proportzionala ez arrazionala iruditzen. Asteburuetan udaltzain brigada berezia jartzeko salaketa horiek baino zertxobait gehiago behar dela uste dut".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.