Lankidetza hitzarmena adostu du Udalak Gipuzkoako Foru Aldundiko Bide Azpiegituretako Departamentuarekin. Lankidetza hitzarmen horren helburua da Mekolalde auzoan, Deba errekaren beste aldean garatzen ari den eremu industrialari behar bezalako sarrera-irteera ematea, eraiki berria den zubiaz baliatuz. Horretarako, zubiak eta GI-627 errepideak bat egiten duten gunean, T itxurako bidegurutzea eraikiko dute –azelerazio eta dezelerazio errailez baliatuz–, zubira sartu edo zubitik irten nahi duten erabiltzaileen segurtasuna bermatuz. Hain justu ere, zubia eraikita dagoen arren –araztegiarekin batera eraiki zuen Eusko Jaurlaritzak harendako sarrera-irteera moduan– gaur egun ez da erabiltzen, GI-627 errepiderako irteera egokirik ez duelako.
Lankidetza hitzarmena
Aldundiarekin sinatuko den lankidetza hitzarmen hori udalbatzak aho batez onartu zuen otsaileko ohiko osoko bilkuran eta jasotzen duenez, Foru Aldundia arduratuko da bidegurutzea egiteko egin beharreko lur desjabetzeez. Udalari dagokionez, proiektua eta obra kudeatuko ditu, baina eremu hartako lur-jabeek finantzatuko dute lana, hau da, han dauden enpresek eta hainbat partikularrek, bakoitzak duen aprobetxamenduaren arabera.
Gaur egun Danobat eta Tornilleria Deba enpresak daude eremu hartan eta baita araztegia ere. Baina horiez gain, oso gertu dagoen Lazpiur enpresak ere zubi hori erabil lezakeela ere aurreratu dute Udal iturriek. Bestalde, gehitu dute Antzuolako Balzers-Elay lantegia ere gune hartara joatekoa dela eta uda aurretik hasi nahi dutela lekualdatzea.
Udalak, bere aldetik, bidegurutzea egokitzeko lanak udazkenean hasi nahi ditu, eta bukatuta izan nahiko lituzkete urte amaierarako.