"Ia sinistu ere ezin dugu egin aita etxean dagoenik, badirudi laino batean gaudela". Hitz horiekin azaldu zituzten Paulo eta Kristina Elkoro anai-arrebek aitarekin etxean emandako lehen orduak, barikuan GOITBn egindako elkarrizketan.
Jose Luis bera ere egoera berri honetara ohitzen ari da oraindik: "Zortzi-hamar metro koadroko ziega batean egotetik etxean jendez inguratuta egotera alde handia dago. Nekatu ere egiten da azkenerako, baina emozio handiz bizi ditu uneok eta oso pozik dago", dio Paulok. "Aldaketa handia da eta denbora beharko du, baina lasai dago, jendearekin egoteko gogoz eta bizitzeko ilusio handiz", gehitu nahi izan du Kristinak. 76 urte betetzeko bidean, bere osasun egoera delikatua da, baina gertukoek kontatu digutenez ,"ondo dago fisikoki eta psikologikoki".
Aitaren deia
Jose Luis Elkorok berak deitu zuen etxera eguazten eguerdian, esateko egun horretan bertan edo, asko jota, hurrengoan, aske utziko zutela; baina horren berri inori ez emateko ere eskatu zien etxekoei, hala egin ezean arriskuan egon zitekeela ohartarazi ziotelako, serioski.
Luzeak egin zitzaizkien ondorengo orduak, eguen eguerdiko 13:45 inguruan Jose Luis kartzelatik ateratzen ikusi zuten arte. "Oso berezia izan zen aita kartzelatik nola ateratzen zen ikustea, oso polita", azaldu digu Kristinak. Paulok kontatu digu atxilotu zutenean guardia zibilek esan ziotela "ez dakit zertarako daramazun maleta", esanez bezala laster aterako zela atzera ere, "baina inoiz ez dakizu zer gertatuko den", gehitu du.
Azken bisean bisa
Elkorotarrak bat datoz jendearen partetik "sekulako laguntza eta babesa" jaso dutela esaterako orduan, eta diote aitak ere sumatu duela "berotasun" hori. "Aitak den dena jakin nahi izan du une oro. Azken bisean bisekoan, esaterako, bere aldeko kirol martxaren berri ematen pasa genituen bi orduak", kontatu digu Kristinak.
Antolatutako ekintzek alderdi, kolore eta pentsamolde ezberdinetako jendea batu dutela ikustea oso garrantzitsua izan da berarentzat, Kristinak kontatu digunez. "Espero dugu aita bakean uztea betiko. Herriaren konpromisoak ekarri du etxera".
Aralar pozik azaldu da aske utzi dutelako, baina ezarri dizkioten baldintzak salatu ditu.