Aurtengo abuztuan ere aire libreko zinema eskainiko dute Bergarako San Martin plazan. Bost filma emango dituzte: hiru euskaraz eta bi espainolez. Filmak dira: Eutsi!; Una verdad incómoda; Mozart txakurra; Noches en el museo; Ekialdea ekialde. “Saiatzen gara filmen erdiak, behintzat, euskaraz eskaintzen. Baina batzuetan ez da hain erraza, filma berriak ekarri nahi ditugulako eta denak ez direlako euskarara itzulita egoten. Eta euskaraz egindako produkzio gutxi dago oraindik”, argitu du Maider Osa kultura teknikariak.
Ikusleei begira, Maider Osak gaineratu du ahalik eta publiko zabalenak ikusteko moduko pelikulak aukeratzen saiatu direla aurten ere.
Aire libreko filmak San Martin plazan emango dituzte, abuztuko eguen guztietan. 22:00etan hasiko dira guztiak. Euria egingo balu, Seminarioko arkupetan emango dituzte.