Bainuetxean oraindik ere hainbat konponketa egin behar dituzte, eta, Unai Asurmendi kirol teknikariaren arabera, baliteke eguenerako (hilaren 20rako) zabaltzea.
Lehen urteurrena
Atzo, domeka, urtebete bete zen Agorrosingo Kirol Eremua zabaldu zela. Unai Asurmendiren hitzetan, "balantzea positiboa da, sarri etortzen diren erabiltzaileak ditugulako. Horrek ere pertsonal baliabideen birplanteaketa egitera bultzatu gaitu, zenbaitetan estu samar ibiltzen garelako dagoen eskaerari erantzun egokia emateko orduan". Honekin lotuta, erabiltzaileen artean inkesta egingo dute datozen bi asteotan: "Instalazioen eta zerbitzuen gainean erabiltzaileek daukaten iritzia jakin nahi dugu", dio Asurmendik. Bazkide kopuruari dagokionez, abuztuan beherakada izan du Agorrosinek: "Uztailean 3.200 bazkide geneuzkan eta, hileroko kuota denez, abuztuan 2.800era jaitsi da. Orain, uda aurreko kopuruetara itzultzea espero dugu".
Kirol jarduerak, gaurtik
Bestalde, gaur, astelehena, kirol jarduerak abian jarriko dituzte Agorrosinen: areto-txirrina, aerodance-a, tonifikazioa, aquaerobic-a, pilates, mantentze gimnasia, 3. adineko gimnasia eta yoga. 1.200 lagun inguru ari dira aipatutako ikastaroetan.
Urrian nobedadeak izango dira: capoeira, gimnasia terapeutikoa eta erreleboka ari direnei zuzendutako areto-txirrina. Era berean, helduen eta umeen igeriketa eskolak urriaren 1ean hasiko dira.