Egubakoitzean ekin zioten hondeatzeko makinek aldagela zaharrak botatzeari, eta zapatuan ere lanean jardun zuten. Oraingo astean, materialak banandu egingo dituzte: hormigoia, adreiluak… eta dena garbitu egingo dute.
220 metro koadrokoa
Udaleko Kirol teknikari Unai Asurmendik eman dizkigu ekipamendu berriaren gaineko argibideak: "Taldeendako sei aldagela, epaileendako bi, bulego bat, bi biltegi eta bi komun izango ditu ekipamenduak. Bi altueratan eraikiko dute, eta denetara 220 metro koadro inguruko hedadura hartuko du".
Asurmendik gaineratu duenez, ekipamendu berriaren abantailetako bat izango da balioko duela Agorrosingo futbol zelairako zein Ipintzako belar artifizialeko zelairako.
Agorrosin eta Ipintzarako
Ekipamendu berria ez dago lehengoaren lekuan, baizik eta estadio barruan. Horrez gain, Agorrosingo futbol zelaiko atletismo pistaren ondoan zanga bat egiten dabiltza aurrerantzean ur zikinak-eta zuzenean araztegira eraman ahal izateko.