Bergarako EHEk balorazioa egin du aurreko astean hiru gaztek izandako epaiketaz. EHEren ustez, "argi ikusi dugu euskaldunon hizkuntza eskubideak urratuak izan direla eta sistematikoki izaten direla administrazio publikoan eta zehazki justizia administrazioan. Ez bakarrik hizkuntza eskubideak urratzen direlarik, baita defentsa eskubideak ere". Horrekin batera, epaiketa orduan epaitegi barruan eta kanpoan bildu ziren guztiei eta babesa eskaini dutenei eskerrak eman die eta ofizialtasuna eskatu du EHEk.
Hemendik aurrerako ekitaldiak
Hizkuntza eskubideen aldeko kanpaina hasiko du Begarako EHEk eta hiru ekitaldi hauek, behintzat, antolatu ditu:
- Aldarrikapen-kalejira. Abenduaren 2an, euskararen egunarekin lotuta eta herri bazkariaren ostean.
- Atxekimenduak. Herriko eragileekin harremanetan jarriko dira abendutik aurrera eta bi hilabetez inguru epaituen eta hizkuntza eskubideen aldeko atxekimenduak lortzeko, urraketak salatzeko eta babesa emateko.
- Manifestazioa.: Babesak eta atxekimenduak lortutakoan, manifestazioa egingo dute babes hori kaleratzeko.