Emakumearen aurkako indarkeria salatzen laguntzeko ekimena jarri du martxan Ongizate sailak. Horrelako egoera bat salatzeko nora deitu behar duten jakiteko txartelak banatuko dituzte. "Aurten bederatzi kasu ezagutu ditugu guk, baina gehiago egongo ziren, ikerketen arabera kasuen %20a baino ez direlako salatzen. Txartel hauekin gure asmoa da biktimak ez ezik, edozein herritarrek salatzea indarkeria egoera bat", azaldu du Arantzazu Amasorrain Ongizateko zinegotziak.
Txartelak, 5.000
Tratu txarrak salatzeko, udaletxeko, Jaurlaritzako eta Aldundiko arreta telefonoak jasotzen dituzten 5.000 txartel banatuko dituzte egun hauetan herriko hainbat gunetan. Nortasun agiriaren tamainakoak dira txartelak. "Asmoa da herritarrek eskura izatea telefono hauek edozein tratu txar salatzeko. Kultura etxean, igerilekuetan, farmazietan edo anbulatorioan banatuko ditugu, besteak beste eta teknikari bat arduratuko da txartelak falta ahala berriak jartzeaz", zehaztu du Jon Lopez Ongizateko teknikariak. "Helburua da administrazioaren laguntza herritarrei hurbiltzea horrelako egoerak salatzerako orduan. Gero geu arduratuko gara salaketak jarraitu behar duen protokoloaz", jarraitu du Lopezek.
Hilaren 25a da emakumearen aurkako indarkeria gaitzesteko nazioarteko eguna.