Unai Iturriotz abokatuak hitz egin zuen segidan, gazteek falta egin zutenetik bi urte pasa zirela kontuan izanik, gertakari horiek preskribituta egon beharko liratekeela esateko. Erabaki horren berri epaiarekin batera emango zuela erantzun zion epaileak eta, hala, hirugarren gaztea ere kanpora atera zen, bere bi lagunek emandako arrazoi beragatik.
Hirurak kanpoan zirela, euren presentziarik gabe, egin zen azkenean epaiketa, gaztelera hutsean.
Elkartasuna adierazten zenbait jende
Bien bitartean, jende taldea bildu zen epaitegi atarian, hizkuntza eskubideak errespetatu eta epaitegiak euskaldundu daitezela eskatzeko. Tartean ziren, besteak beste, Bergara Aurrerako Mila Elortza, Aralarreko Iñigo Iñurrategi, Hizkuntza Eskubideen Behatokiko zuzendaria Paul Bilbao eta Euskal Herrian Euskarazeko eta Jarduneko kideak.