Juan Luis Bikuña kazetaria badabil dagoeneko informazioa batzen: "Bandari buruzko lehen agiri ofiziala 1832koa da, baina baliteke urte batzuk lehenago sortu izana, 1.500 errealetako dirulaguntza eskatzerako orduan Como en años anteriores... espresioa azaltzen delako. Dena dela, hortik abiatuko naiz historia batzeko: udal artxibora eta ahozko iturrietara joko dut datuak jasotzeko", adierazi digu Bikuñak.
Erretratu zaharren bila
Liburua 2007ko irailean argitaratuko du Udalak, euskaraz eta gazteleraz. Bandaren historiarekin batera, argazkiak eta hainbat elkarrizketa izango ditu, tartean Carmen eta Miguel Gonzalez Bastida anai-arrebei eginikoak.
Argazki zaharrak dituztenek Bandak Musika Eskolan duen egoitzara edo Bidekurutzetako Gracian dendara jo dezakete.
Udal Musika Banda 72 lagunek osatzen dute gaur. Alfredo Gonzalez Chirlaque dugu taldeko zuzendaria 1987tik, Miguel bere aitaren lekukoa jaso zuenetik.