Oraindik ez dago ehuneko ehunean, hori da Juan Martinez de Irujok kazetarion aurrean onartu duena. Astebete pilota ukitu barik egon eta gero, gaur egin du entrenamendu saioa, Lasaren kontra lehenengo koadroetan lehiatuta. Hala, domekan hesgailuekin jokatuko duela dio, badaezpada ere, baina konfiantza handiagoarekin dabil.
Horrekin batera, domekan aurrean izango duen Asier Berasaluzeren gainean ere berba egin du: "Egia esateko, gurago dut Berasaluzek zelan ateratzen duen ez ikustea, badaezpada ere. Dena dela, nik 22 tanto egiten baditut, ez dit axola sakez 16 tanto egiten badizkit".
Saria
Horrela laburtu du Asier Berasaluzen domekako partidua: "Orain dela bi urte eta erdi egin nuen profesionaletan debuta, eta domekan Irujoren kontra lehiatzea saria da niretako. Sakea? Egia esan, askotan pilotari zelan ematen diodan ere ez dut jakiten, baina egia esan, nahiko ondo ateratzen dut".