Mendiaren magala eusteko lanak bi fasetan egin dituzte, eta, hain justu, bigarrena da bukatzear daudena. Lehenengoa 2005ean egin dute eta irristatze gunearen goiko zein erdiko aldeetan pareta bana egin dute. Bigarren fasea 2006an egin dute eta horretan ere bi pareta egin dituzte. Paretok egiteko eta lur-jauzirik berriro ez gertatzeko, lurra kendu dute menditik eta harrobian sartu dute. Bestalde, paretak handiak eta sendoak dira: egin duten hirugarrenak, esaterako, 54 metro ditu luzeran eta lau altueran. Aldundiak egindako lanok 6,2 milioi euroko aurrekontua izan dute.
Hainbat eragozpen
2003ko maiatzean itxi zuten Urteaga, eta horrek hainbat eragozpen eragin dizkie inguru hartako bizilagunei, enpresei eta bergarar zein antzuolarrei, oro har. Izan ere, 2,5 kilometro gehiago egin behar izan dituzte herri batetik bestera joateko.
Euren etxebizitza laga behar izan zuten bost familiaren kasuan, oraindik ez dute etxera itzultzeko jakinarazpenik jaso. Izan ere, euren etxe ostean hainbat lan daude oraindik egiteko. Aldundiak Udalari arriskurik ez dagoela jakinarazi eta Udalak baimenduko du itzulera.