Errege Seminarioa patronatuaren esku egongo da gaurtik aurrera

Eraikineko fatxada berrituko dute eta hainbat konponketa egingo dituzte barruan, auditorioa eta ikastolako lan berriekin batera.

Gaur, egubakoitza, 11:00etan, dute hitzordua eginda errege seminarioaren lagapen hitzarmena sinatzeko Victoriano Gallastegi alkateak, Juanjo Alvarez Unedeko zuzendariak eta Paulino Luesma Espainiako gobernuak Euskadin duen delegatuak.

Baldintzak

"Lagapen honek bi baldintza nagusi ditu: Unedek Bergaran jarraitzea eta eraikina hezkuntzarako eta kulturarako erabiltzea", dio Juanjo Alvarez Unedeko zuzendariak. "Horregatik, Unedek eta Aranzadi ikastolak bertan jarraituko dute eta hirugarren zatia udalak erabiliko du auditorioa egiteko", azaldu du segidan Juanjok.

Dena berrituko dute

Eraikina patronatuaren esku egonda, zati bakoitza erabiltzeko lanak hasiko dituzte. Kanpotik begiratuta, eraikinaren fatxada eta arkupeak berrituko dituzte eta ikastolak sarrera berri bat izango du Munibe plazatik, pasabide bat eginez. "Telefonicako eta San Martin plazako sarrerak galduko ditugu eta Munibekoa eta jolastokiko biak izango dira sarrera berriak", dio Patricia Urrutia Aranzadiko zuzendariak. San Martin plazako sarrera nagusitik auditoriora sartuko da gero eta Unedera joateko, berriz, beste sarbide bat egingo dute ezkerretara, Banco Guipuzcoano aldera.

Barruko aldaketak ere handiak izango dira. "Unedek erabiliko duen gunean, adibidez, gela handiekin txikiak egingo ditugu, komun berriak egingo ditugu, igogailua jarriko dugu, liburutegi berria eta beste solairu bat izango du eta eraikin osoan wifi sistema sartuko dugu. Gero eta ikasle gehiago ditugu eta lan hauek ikastetxearen eskaintza sendotuko dute", dio Juanjo Alvarezek.

Auditorioa egiteko, berriz, erretaula atzera botako dute. "500 lagunendako tokia izango du eta proiektua irailaren 15erako entregatuko dute", dio Victoriano Gallastegi alkateak. Hori egiteko, ikastolako gela batzuk erabiliko dituzte baina beste txoko bateko tokia hartuko du gero ikastolak.

Jolastokian aparkalekua

Ikastolako jolastokian aparkalekua egingo dute, "baina datorren ikasturtea bukatu arte, behintzat, ez dituzte lanak hasiko", aurreratu du Patriciak. Gainerako lan guztiak 2007an hasiko dituzte, auditorioaren proiektua aztertu eta gero.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.