Bergarako Ipintza Institutuko ikasleek ez-ohiko bisita izan dute gaur: Jaime Garcia kolonbiarra izan da eurenean. Mundu osoan da ezaguna matematiketarako duen gaitasunagatik. Izan ere, oso denbora laburrean zailtasun handiko eragiketen emaitza kalkulatzeko gai da. Ipintzako ikasleek botatako zenbaki ezberdinen sinu, kosinu, tangente, kotangente, erro karratu edota logaritmoak kalkulatu ditu, dezimal guztiekin eta instantean bertan, ikasleek zenbaki osoa esaten bukatzerako ia.
Landutako gaitasuna
Azkarra da Jaime Garcia, baina dio duen gaitasuna landutakoa dela, ez jaiotzetik datorkion zerbait.
Egun batean, maisu batek abakoa maneiatzen irakatsi zien, ordea, eta gertakari hark ordura arteko ikuspegia aldarazi zion. Bitxia iruditu zitzaion oso eta etxera joandakoan halako bat egin zuen: eragiketa errazekin hasi eta zailagoekin jarraitu zuen.
Kalkuluak egiten onenak, gainerako materietan bezala, ekialdekoak direla dio: txinatarrak, japoniarrak, korearrak, baina Jaime Garciak ez du haien inbidiarik: abakoa buruz ezagutzen du, baita milioi bat urtetako egutegiak ere. 5 Ginness errekor ditu, horietako bat irakurketa bakarrean 200 zenbaki memorizatzeagatik. Kontzentrazioa, diziplina eta logika dira gakoak. Jaime Garciak abiadura sinestezinean kalkulatzen ditu emaitzak.