Arcelor taldeko enpresa da Bergarako Labegaraietakoa ere. 2000. urtera arte Aceraliaren enpresa zen Bergarakoa, baina urte horretan osatu zen Arcelor taldea Espainiako Aceralia, Belgikako Arbed eta Frantziako Usinor-Sacilor siderurgiekin batera. Arcelor taldearen lantegirik txikiena da gaur egun Bergarakoa.
Langileen ezjakintasuna
Bergaran 284 langile ari dira Arcelorren. Aurretik, Aceralia jabe bakarra zenean, 312. LAB sindikatutik adierazi digutenez, "enpresatik ez dugu inolako informaziorik jaso. Baina horrelako operazioen kontra gaude, erabakiguneak hain urruti egoteak funtzionamendua zailtzen baitu". ELA sindikatutik azaldu digutenez, "operazio finantzarioa da industriala baino gehiago, baina ofizialki ez digute ezer esan. Hala ere, kezka beti dago. Arcelorrek beti esan izan du etekina ateratzea duela helburu".