Eduardo Arrillaga 1966an jaio zen Elgoibarren eta ibilbide luzea eta oparoa egin du argazkilaritzan. 1987an hasi zen argazkilaritza ikasten Bartzelonan eta 1990etik hainbat erakusketa egin ditu. Sariei dagokienez, iaz, esaterako, Espainiako Argazkilaritza Herrikoiaren Lehiaketan 2. saria jaso zuen eta Luis Valtueña Argazkilaritza Humanitarioaren Lehiaketan finalista izan zen. Era berean, Arrillagak hainbat komunikabidetan argitara eman ditu bere lanak.
Zuri-beltzeko 34 argazki
Bergaran ikusgai izango den Sokamuturra izenburuko erakusketa zuri-beltzeko 34 irudiz osatuta dago. Hamar bat urtez jardun zuen Arrillagak sokamuturreko argazkiak ateratzen, kasu gehienetan txekorrengandik oso gertu. Jaietako tradizio hori jaso nahi izan du eta indar berezia duten argazkiak dira, sokamuturrean parte hartzen dutenen beldurra, sustoak eta jai giroa antzeman daitezkeelarik. 1992-2001 bitarteko argazkiak dira.
Hitzaldia uztailaren 15ean
Erakusketa uztailaren 24ra arte izango da zabalik eta sokamuturraren gaiarekin lotutako hitzaldia emango du Iñaki Azkunek hilaren 15ean, Aroztegin bertan. Aretoa maiatzaren 12an ireki zuten, Abdon Juaristiren erakusketarekin. Arrillagarena, beraz, Aroztegin egingo duten bigarren erakusketa izango da.