Sarrera bikaina izan zen astelehenean Udal Pilotalekuan eta hara joandako pilotazaleek tanto bikainak ikusteko aukera izan zuten. Esan bezala, 22 urtetik azpikoen mailan, Apezetxeak eta Diez de Ultzurrunek 22-13 irabazi zieten Renobales eta Iraolari. Apezetxea goizuetarra izan zen finaleko onena eta berak eraman zuen pilotari onenari zegokion trofeoa.
Okiñenaren bigarren finala
Nagusien mailan, Okiñena iruindarra bigarren aldiz heldu zen finalera: orain bi urte, Irujorekin bikotea osatuz, Eguzkitza eta Erauskinen aurka galdu zuen. Astelehenean, txapela janzteaz gain, pilotari onenaren saria jaso zuen, zaleen txaloen artean. Diaz bere bikotekideak egin zuen txapelketako azken tantoa, bikaina benetan, txapelketari amaiera ezin hobea emanez. Antolatzaileak pozik, pilotariek erakutsitako mailarekin eta txapelketan zehar Udal Pilotalekuan izandako ikusle kopuruarekin
Herri arteko txapelketa ostiralean
Bestalde, Herri Arteko Txapelketaren barruan, Bergarak Lazkaoren aurka neurtuko ditu indarrak egubakoitzean, hilaren 20an, Udal Pilotalekuan, 19:30ean. Joaneko partiduetan lazkaotarrak nagusitu ziren, 2-1. Kadete eta gazte mailetan, emaitza berarekin nagusitu ziren: 22-16. Senior mailan, berriz, Bergarak 7-22 irabazi zuen. Lazkao gainditzen badute, Zumarraga eta Urnieta arteko kanporaketako irabazlearen aurka jokatuko du Bergarak.