Arazo ekonomikoengatik itxi dute zinea. Novedadeseko arduradunak behin baino gehiagotan kexatu izan dira ikusle kopuruaren murrizteaz. Azken bi urteotan udaberritik irailera arte itxita egon da. Badirudi oraingoan betiko itxi dutela.
Lokala pribatua da eta kudeatzaileek alokatuta zeukaten. Neurri handi batean, udal laguntzei esker egin izan du aurrera Novedades aretoak azken urteotan. Bergarako Udalak dirulaguntza eman die kudeatzaileei aste bukaeretako zine emanaldiak eta eguenetako zine-klubeko programazioa antolatzeagatik.
Bestalde, Udalak ere erabili izan du aretoa hainbat ikuskizunetarako, antzerkia nagusiki. Urtero, 25 emanaldi antolatzeko eskubidea zuen Udalak. Horietako emanaldi bakoitzarengatik lokalaren alokatzea ordaintzen zuen Udalak.
Garai baten hiru zine areto egon ziren Bergaran: Cinema (gaur Burdiñateko etxeak dauden tokian), Irala eta Novedades. Irala 1980ko hamarkadaren erdian itxi zuten eta Novedades izan da ordutik areto bakarra.
Entre copas izan da Novedades aretoan eskaini duten azken filma, joan den martxoaren 29an.