Aspe enpresako kideak eta Astelenako jabeak ez dira ados jarri. Enpresatik aditzera eman dutenez, Astelenan gero eta partidu gutxiago antolatzen dituzte, bertara joaten den ikusle kopuruak behera egin du, eta errenta garestitu egin da; partiduko, 3 mila euro ordaintzen dizkio Aspek Astelenari, eta pilota enpresak ezin du diru kopuru hori ordaintzen jarraitu. Errenta hori gutxitzeko eskaerari Astelenako jabeek ezetz erantzun diotela ikusirik, Aspeko arduradunak Bergarako Udalarekin jarri dira harremanetan. Astelehenean izan zuten bilera, Aspek hala eskatuta. Bergarara etorri nahi dutela esan eta urteko egutegia aurkeztu zien Fernando Vidartek udal ordezkariei; 15 partidu izango dira, abendua bitarte.
Hitzarmena, sinatzeke. Konpromisoa, hartuta
Hitzarmena sinatzeke dago oraindik, baina konpromisoa hartuta. Instalazioak erabiltzen uzteaz gain, 18 mila euro emango dizkio, orotara, Bergarako Udalak Asperi.
Lortutako akordioa 2005erako da, baina Bergarako Udala prest dago 2006rako negoziaketak hasteko: abenduan hitzarmena ez eteteko eta aurrerantzean Bergaran partiduak antolatzen jarraitzeko eskatuko dio pilota enpresari.
2006an zer gertatuko den ikusteke dago oraindik, baina 2005erako lortutako akordioa aste honetan bertan, ostiral arratsaldeko bostetan, ofizialduko dute. Bergarako lehen norgehiagoka hilaren 13an jokatuko da .
Herritarrak, pozik
Bergarako udal pilotalekuan 1.200 lagun inguru sartzen dira. Eibarko Astelena baino zerbait txikiagoa da, baina azpiegiturak egokiak dira. Herritarrek gogoan dituzte bertan asteko bi partidu jokatzen zireneko garaiak, eta begi onez hartu dute albistea.