Udaleko batzordeetan lanean hasiko diren arren, udalbatzan benetako ordezkaritza izateko borrokan jarraituko dutela adierazi zuten Maite Guridi, Jesus Mari Garitano, Mikel Eguren eta Mila Elortzak: Dagozkigun hautetsien auzia konpontzeke dago, eta lan horretan jarraituko dugu.
Udal gobernuari kritikak
Udal gobernuaren lana kritikatu zuen BAk: "Gestio eskasaren adibide gisa, hor dira kolektoreko lanak, igerilekuen proiektua eta Urteaga kalean gertatutakoa. Kolektoreko lanen gainean zera adierazi zuten: Horrelako obra bati probetxua atera behar zaio, aspalditik pentsatuta dauden hainbat proiekturi aurre egiteko; gasolindegiaren inguruko eta Torrekuako biribilguneak eta Ibarrako urbanizazioa, besteak beste. Bideberrin gertatutakoa ere hor dago: herritar batek abisua eman ez balu, zuhaitz erdiak galduta lirateke honezkero.
Urteaga eta kirolgunea
Urteaga itxita jarraitzea ere larritzat jo zuten BAko ordezkariek: Udalaren aldetik presio handiagoa egin behar da, ezin da horrenbeste denbora igaro gaiari heldu barik. Kirolgune berria ere aipatu zuten: "Finantziazioari buruz eta lanen epeei buruz gauza handirik ez dakigu oraindik. Azkenik, Ariznoa plazan egiten diharduten proiektuak plaza horrek izan duen erabilera soziala ez duela bermatzen gaineratu zuten, "lehen ziren zuhaitzen eta jarlekuen tokian, zuhaitz bakarra eta jarleku pare bat besterik aurreikusten dira-eta.