Bergarako Udaleko Euskara Batzordeak, Udal euskaltegiak, Akulu AEK euskaltegiak eta Jardun euskara elkarteak indarrak batu dituzte euskarari bultzakada berri bat emateko. Euskararekiko sentiberatze kanpaina jarri dute abian, helburu bikoitzarekin: euskara ez dakitenak ikastera animatzea, eta dakigunok egitera bultzatzea.
Gurasoak eta merkatariak, elementu klabeak
Horretarako, irailean zehar, kanpainaren nondik norakoak jasotzen dituen gutun bat igorriko diete gurasoei, merkatariei eta Jarduneko bazkideei, ahalegin honetan elementu klabeak direlako hirurak. Seme-alabei euskaraz egitea zeinen garrantzitsua den azalduko diete gurasoei, eta merkatariei bezeroei lehen berbak euskaraz egiteko, kartel eta abarrak euskaraz jartzeko edota ingurukoak euskaraz egitera animatzeko eskatuko diete. Kanpaina martxan jarrita, ikas eta erabiltze prozesuak uztartzeko ekimenak antolatuko dituzte ondoren.
Bergararren ehuneko hirurogeita hamarrak daki euskaraz, baina erabiltzaileen portzentajea apur bat baxuagoa da. Urtero moduan, aurten ere Bergarako kaleetan euskararen erabilera nolakoa den aztertu dute eta, behin datuak aterata, azkenaldi honetan nabaritzen den ildoa mantentzen dela baieztatu dute arduradunek: haurretan erabilera nahikoa finkatuta dagoela, gazte eta helduetan gorantz doala, eta 3. adineko pertsonetan erabilera gutxitzen doala.
Abian jarri berri duten egitasmoa Euskara Biziberritzeko Plan Nagusiaren barruan kokatzen da, eta orain arteko datuak hobetzeko bidea emango du.