Ikastetxeko arduradunen arabera aspalditik datorren kontua da. Eskolarik eza aprobetxatuz eta eraikinaren alderdi hori nahikoa ezkutuan geratzen dela baliatuz harriak eta bestelakoak botatzen dituzte leihoetara, kristalak eta pertsianak hautsiz. Lehen, gainera, leihoetako kristalak hautsita ikastetxe barrura sartzen omen ziren, eta beti egon behar izaten omen zuten zer puskatu edo lapurtuko zuten beldurrez.
Egoera ikusita Aranzadi ikastolako arduradunek eraikinean alarma jartzea erabaki zuten; gaizkileak ikastetxera sartzea eragotzi dute horrela, baina ez da nahikoa. Eraikinaren atzealdeko geletako txikizioek ez dute etenik.
Udalari kritika
Irakasleek azaldu digutenez ikastolak sarri jo du Udalarengana arazoaren berri emanaz. Izan ere, Bergarako Udala da eraikinaren mantenuaren arduraduna. Aranzadikoek salatzen dute Udalak ezer gutxi egiten duela arazoa konpontzeko. Txikizioren bat gertatzen den bakoitzean kristal eta pertsiana berriak jartzen omen dizkiete, baina besterik ez.
Ikastolakoek eskatzen dute txikizioak konpontzen ezezik hauek eragozten egin dezala Udalak ahalegin gehiago. Jar ditzala hesiak ikastetxearen kanpoaldean, eta baita leihoetan barra batzuk ere. Aranzadi ikastolakoek diote egoera jasanezina dela, eta tamaina honetako arazoaren aurrean Bergarako Udalak abandonatuta dituela.