Mikel Larrañaga arkitektoren proiektuaren arabera, herriko musika taldeendako hamar lokal izango dira Goiko Estazioko eraikinean. Eraikinak bi solairu izango ditu eta horietako bakoitzean bost gela eta komuna egongo da. Musika taldeendako lokalak 11,6 m2 eta 12,15 m2-koak izango dira. Lanen aurrekontua 181.000 euro inguru da. Proiektu teknikoa idaztea, berriz, 10.400 euro kostatu da.
Lanak uda ostean hasiko dira
Herriko hainbat musika taldek erabiltzen dute Goiko Estazioa, entseguetarako. Joan zen martxoaren 22ko batzarrean, gobernu batzordeak rock taldeekin lokalaren erabileraren gainean sinatutako hitzarmena beste sei hilabetez luzatzea erabaki zuen. Hala ere, eraikina orokorrean eta teilatua bereziki egoera txarrean dira, eta eraikina berritzeko erabakia hartu du Udalak. Kultura batzordeko iturrien arabera, lanak uda ostean hasiko lirateke.