Bergarak protagonismo berezia izango du gaur hasiko den Euskal Herriko Itzulian. Izan ere, bertan hasi eta bukatuko da itzuliko lehen etapa. Gainera, ibarreko zenbait herri eta mendatetatik igaroko dira gaur ziklistak.
Bergarako San Martin plazan hasiko da lasterketa, 13:45ean, eta 139 kilometro bete beharko dituzte txirrindulariek. Ez dute lan erraza izango, lau mendate izango dituztelako tartean: Itziar, Elosu, Deskarga eta Asentzio. Azken hau (2. mailako mendatea), 131. kilometroan, erabakigarria izango da ziurrenik. Irabazlea 17:15 aldera iritsiko da Ibargaraiko helmugara.
Itzuli menditsua
Lehen etapaz gain, martitzenekoa Bergaran hasiko da. Ohikoa denez bost etapa jokatuko dira. Itzulia bereziki gogorra izango da aurten. 765 kilometro eta 28 mendate gainditu beharko dituzte txirrindulariek. Egubakoitzean Lazkaon amaituko da itzulia eta orduan jakingo da nor izan den indartsuena. Urtero moduan, zaila da faboritoak nortzuk diren aurreratzea. Hala ere, Vinokourov, Valverde, Hamilton, Samuel Sanchez, Di Luca, Basso eta Jens Voigt kiniela guztietan daude. Iban Mayo iazko irabazlea ere ezin ahatz dezakegu.
Edozein modutan ere, emoziorik ez da falta izango eta zaleek goi mailako txirrindularitzarekin gozatzeko aukera paregabea izango dute. Festa borobiltzeko eguraldi ona iragarri dute datozen egunotarako.