Bergararen Zabalkunde Turistikorako Plangintza 1994an jarri zuten abian, herriko ondarea ezagutzera emateko asmoarekin. Turismo Bulegoa, berriz, hurrengo urtean, 1995ean, zabaldu zuten aurreneko aldiz.
3.500 bisitari urtero
Xabier Aranburu udal museologoak adierazitakoaren arabera, urte hauetako balantzea positiboa da. Gaur egun, 3.500 bisitari inguru etortzen dira urtero Bergarara. Turista gehienak Bergarako ondarea ezagutzeko etortzen omen dira. Aranburuk zera esan digu: "Bergarak ondare aberatsa dauka eta gauza positiboa da kanpoko jendeak gure altxorrak ezagutzea. Azken urteotako datuetan oinarrituz, maiatza, abuztua eta iraila dira turista gehien jasotzen dituzten hilabeteak".
Bisita gidatuak
Esan bezala, Turismo Bulegoa irailaren 30era arte izango da zabalik. Aurreko urteotan bezala, Bergarako Udalak Bilboko Nis enpresari adjudikatu dio zerbitzua. Nis enpresako Isabel Lopez, Josune Galartza eta Maialen Elortza izango dira Turismo Bulegoan lanean, txandaka. Aste barruan 10:30etik 14:00etara eta 16:30etik 19:30era zabalduko dute eta domeka eta jaiegunetan 11:30etik 14:30era. Hala ere, Aranburu museologoak aurreratu digunez, ez dute domeka guztietan zabalduko. Turismo Bulegoak herriko ondarea erakusteko bisita gidatuak antolatuko ditu.