Besteak beste, fruitu arbolak, mendiko arbolak eta etxea apaintzeko erabiltzen direnak ere izango dira ikusgai eta salgai zapatuko azokan. Era berean, zuhaitzen ezaugarrien gaineko erakusketa ikusgai jarriko dute.
Zuhaitz landaketa Pol-Polen
Bestalde, zuhaitz landaketa egingo da eguerdi partean Pol-Polen, Keixeta inguruan. Mariaren Lagundia, San Martin eta Aranzadi ikastetxeetako gaztetxoak gonbidatu dituzte landaketan parte hartzeko. Autobusak Ibargaraiko geltokitik aterako dira, 10:30ean. Santutxuraino helduko dira eta handik Pol-Polera oinez edo udalak jarritako lanroberretan joateko aukera izango da.
Gaztetxoek udaleko teknikarien eta Mendia Bizirik taldeko kideen laguntza izango dute landaketa egiteko. Bihar, 50 haritz eta beste horrenbeste pago landatuko dituzte. Landaketan parte hartzen duten neska-mutikoei ogitartekoa, edaria eta kamiseta bana emango zaizkie.