Ibaiondon izan du egoitza orain arte Aspacek. Baina leku faltak eta jendearen eskari igoerak eraginda, herrian bertan beste leku batera aldatzeko erabakia hartu dute. Merkatu plazaren parean, Boni Laskurain kalean izango da kokaleku berria eta lokala egokitzeko lanetan aurki hasiko dira.
Egoitza berriak guztira, 264 m2 izango ditu egungoak baino 100m2 gehiago. Lokal horretan erabilera anitzeko gela handi bat, komun gehiago, sukaldea eta administrazio kontuetarako bulego bat izango dituzte. Azken honetan fisioterapia gela ere egongo da.
Debarro osorako zerbitzua
Orain arte Aspaceko eguneko zentroan 26 lagunendako tokia egon da, baina egoitza berria jende gehiago hartzeko gertatuko dute, 32 hain zuzen ere. Gainera, kontuan hartu behar da Bergarako zentroak Debarro osoko gaixoak hartzen dituztela.
Eguneko zentroak babestutako lantegietara joaterik ez duten garun elbarriei bideratuta daude. Ikasketak sendotzeko eta heldutasunera bideratzeko programak zein lanera moldatzekoak eta errehabilitaziozkoak garatzen dira bertan.