Artekale osoa urbanizatzeko asmoa dauka Udalak; horretarako proiektua Iñaki Aspiazu arkitektoak idatziko du. Bi hilabeteko epea izango du dokumentua idazteko, eta 11.805 euroko aurrekontua.
Udaletxe osteko zatia bezala
Udaletxea eta San Pedro arteko zatia bezala urbanizatuko dute Artekale osoa. Irisgarritasun arauei jarraituz, lurzoru guztia maila berean egingo dute, eta oinezkoek izango dute lehentasuna. Dena dela, momentuz, ez da soilik oinezkoendako kalea izango. Izan ere, alde zaharreko trafikoan hainbat aldaketa egin beharko dituzte horretarako.
Proiektu hau Eusko Jaurlaritzaren Izartu programan aurkeztuko dute, diru laguntzak lortu ahal izateko. Izartu programarekin, gainbehera datozen udalerriei laguntzak emango dizkie Jaurlaritzak.