Udalbatzarrak asteleheneko osoko bilkuran onartutakoa, Labegaraietan skate pistak egiteko lehen urratsa izan zen. Kirol gune horretan dagoen auditorioa eraisteko proposamen teknikoa eta lanen baldintza plegua onartu zituen, hain zuzen ere. 13.950 euroko aurrekontua izango dute lan horiek.
Bestalde, Udaleko arduradunek azaldu zutenez, datorren astean bertan aurkeztuko du Iñaki Berasategi arkitektoak Labegaraietako kirol eremu berriari dagokion planoa. Pare bat hilabete barru, berriz, proiektu teknikoa ere aurkeztuko du arkitektoak.
Lehenengo skate pistak
Udalaren asmoa da Labegaraietako gune horretan skate pistak egitea. Gaur egun, ez dago herrian era horretako pistarik. Kirol hori praktikatzen dutenak, baina, asko dira. Udaleko arduradunen esanetan, herritarren artean skate pisten eskaria badago, eta bideragarria ikusi dutenez, hortxe egingo dituzte pistok. U itxurako pistak izaten dira skate-arekin ibiltzekoak.
Dena dela, behin auditorioa eraisten dutenean, tokia aztertu eta orduantxe erabakiko dute zenbat pista eraiki.