Beste urte batez, Arrasateko Kirol Elkartearen eskutik, tenis eta padel txapelketak jokatuko dira Santamasetan. Azaroaren 15era arte (egun hori barne) egongo da txapelketetan izena emateko aukera eta bikote bakoitzak bikotekideen izen-abizenak, posta elektronikoak eta telefono zenbakiak bidali beharko ditu ake.padel@gmail.com edo ake.tenis@gmail.com helbidera. Teniseko txapelketan izena emateak 10 euro balioko du; padelekoan, 20 euro, bikoteko.
Txapelketako plazak mugatuak izango dira: padelean 32 bikotek izango dute parte hartzeko aukera; tenisean, berriz, 24 jokalarira mugatuko dituzte plazak. Txapelketa azaroaren 20an hasiko da eta partidak asteburuetan jokatu ahalko dira, egubakoitz arratsaldeetan, 17:30ean hasita. Antolatzaileek jakinarazi dute ordutegiak eta egunak koadroa osatzerakoan jarriko direla. Finalak abenduaren 19an, zapatuan, jokatuko dira.