Jazz klasiko, swing eta manouche kontzertu bat hartuko du Kajoi tabernak eguenean, azaroak 5, 19:00etan. Hala, Iñigo Zubizarreta gitarra-jotzaile eta gitarra-irakasle arrasatearrak oholtza partekatuko du Daniel Apodakarekin (biolina), Ibon Perezekin (gitarra) eta Enrique Lafuenterekin (kontrabaxua), "musika horren aberastasuna eta energia deskubritzera" gonbidatzen duen proposamen instrumental batean, antolatzaileek adierazi dutenez.
Zubizarretak haurtzaroan hasi zituen musika-ikasketak Arrasaten, eta Zaragozan (Espainia) eta Bostonen (AEB) jarraitu zuen bere prestakuntza. Soziedad Alkoholika, Governors eta Tako taldeetan aritu izan da, baita Erromintxelak taldean ere. Egueneko emanaldiari dagokionez, Django Reinhardt gitarristari eta 30eko hamarkadako Parisi lotutako jazz manouche-a izango da emanaldiaren interes puntu handienetako bat.
