Emakume Musulmanak Euskal Gizartean Integratzeko Elkartea da IMME. Hain zuzen ere, helburu hori lortzeko bidean sortutako proiektua da Elkarrekin kozinatuz izena jarri diotena. "Gure errealitateei buruzko jakintza falta handia dagoela iruditzen zitzaigun. Hori dela eta, modu gertuko eta goxo batean, askotariko gaiei buruz hitz egiteko saio bat egitea pentsatu genuen", azaldu du IMME elkarteko Djamila Zereibyk.
Proiektua gauzatzeko Ausolanek emandako "ezinbesteko laguntza" eskertu du Zereibyk. Han bertan egin dituzte grabaketak eta, oraingoz, hiru saio grabatu dituzte. Lehen saioa Emakumeak, lana eta autonomia da; bigarrena, Emakumeak, migrazioa eta berdintasuna; eta, hirugarrena, Emakume migratzaileak, etxebizitza eta aukera berdintasuna. Solasaldi bakoitzean lau parte-hartzaile egon dira.
Hiru saio horiek edizio fasean daude orain eta laster jarriko dituzte ikusgai sarean. Era berean, beste saio batzuk grabatzea ere aurreikusten dute. Solasaldiak gaztelaniaz dira.
