Ohar bidez azaldu dutenez, Udalak dagoeneko baditu herritarren parte-hartzea sustatzeko irizpide batzuk, baina ordenantza berri baten bidez, herritarrek Udalaren erabakietan eta kudeaketan parte hartzeko dituzten bideak argiago zehaztu nahi ditu. Horrela, parte-hartzea modu egonkorrean sustatu eta jarraipena emateko aukera izango du.
Ordenantza lantzeko prozesuak sei hilabete iraungo du, eta herritarren ekarpenak jasotzea izango du oinarri. Lanketa, aurretik prestatutako ordenantza-proposamen batetik abiatuko da, Toki Erakundeen Legea eta Arrasateko egungo egoera eta beharrak kontuan hartuta.
Udalak herritarrak eta herriko eragileak gonbidatzen ditu prozesuan parte hartzera, haien iritziak eta proposamenak funtsezkoak baitira Arrasateren beharretara egokitutako parte-hartze eredua eraikitzeko.