Udaletik ohar bidez aditzera eman dutenez, norberak bere osasun-arretari buruzko erabakiak hartzea eta bere balioak eta lehentasunak errespetatuak izatea funtsezkoa da. Horretarako, aurretiazko borondateen dokumentuak (ABD) aukera ematen du pertsonak bere kabuz hitz egin ezin duenerako zaintzei buruzko jarraibideak jasota uzteko.
Dokumentuaren garrantziaz jabetzeko eta herritarrei hura egiteko prozesuan laguntzeko, bi saio antolatu dira Arrasaten, azaroan. Ekimenaren bidez, dokumentuaren inguruko informazioa eskainiko da, eta hura formalizatzeko aukera ere izango dute interesa duten herritarrek: "Aurretiazko borondateen dokumentuak pertsonaren duintasuna eta lehentasunak errespetatzen laguntzen du, eta, aldi berean, gertukoen erabakiak hartzeko zama arintzen du. Gainera, edozein unetan aldatu edo baliogabetu daiteke".