Gaur zabaldu dute Bi belaunaldi, bi begirada akuarela erakusketa Arrasateko Kulturateko klaustroan. Ignacio Sainz Larretxau Etxarri (Usurbil 1913-Arrasate 1979) eta Matilde Sainz Osinagaren (Arrasate 1950) lanak dira. Aita eta alaba dira eta biak akuarela egileak.
Etxarrik akuarela-ondare zabala utzi zuen. Julio Galarta margolari arrasatearraren garaikidea izan zen eta tarteka elkarrekin aritzen ziren Arrasatetik gertuko auzo batzuetan elkarrekin margotzen. Paisaietan eta naturan aurkitu zuen nagusiki inspirazioa.
Matilde Sainzek, berriz, beste gai batzuetara ere zabaltzen du begirada, formak, koloreak eta emozioak esploratuz. Erakusketara ekarritako artelanak bi multzotan banatu daitezke: alegorikoagoak direnak eta konkretuagoak diren gaiak jasotzen dituztenak –Oteizaren apostoluak, glaziarrak urtzen, ur ertzeko figurak…–
Bi sentsibilitate ezberdin dira pinturaren bidez hitz egiten dutenak.
Bisita gidatuak
Goienagusiko kidea da Matilde Sainz Osinaga eta bi bisita gidatu egingo ditu Goienagusiko bazkideendako; azaroaren 2an euskaraz eta azaroaren 9an gazteleraz, ohikoa hitzaldiak amaitutakoan.