Urriaren 23ko jai hainbat elkarterekin elkarlanean azaldu du PlazaBiziko koordinatzaile Agurtzane Loidik: "Gure helburuetako bat da herriko natura-guneak gehiago erabiltzea eta horregatik erabaki genuen jai bat antolatzea Santa Barbaran bertan, altxor hau gehiago erabili dezagun; espazio eder honek hainbat erabilera izan ditzakeela erakutsi nahi dugu. Hainbat elkarterekin eta Udalarekin batera antolatu dugu; ea eguraldia lagun dugun...".
Hiru orduko egitaraua
Horretarako ume, gazte zein helduendako ekintzak antolatu dituzte: txalaparta; margo eta sendabelar tailerrak –mundu hori ezagutzeko eta haien propietateak ikasteko aukera egongo da–; haur eta familiendako Altxorbarbara jolasa; PlazaBizi ekimenaren baitan orain arte egindako lanak erakusten dituen argazki-erakusketa –ur txorroten ondoan–; eta bizikleta bat, bi patinete eta "mugikortasun aktibo baterako" osagarrien zozketa. Horrez gain, ekintzok girotzeko trikitilariak, pandero-joleak eta txistulariak ere ibiliko dira "zirkuituan" zehar; eta jaiari amaiera emateko Pentsauko Jatzu taldearen kontzertua ere antolatu dute ur txorroten inguruan, 19:00etan.
'Altxorbarbara', Santa Barbarako altxorraren bila
Santa Barbara Piztu Jaiko ekintza esanguratsuenetako bat da Altxorbarbara jolasa, 5 eta 10 urte arteko umeentzat prestatu duena Txatxilipurdik, eta Muzibarko biribilguneko pergolatik abiatuko dena (17:00). "Santa Barbara jolasaren bitartez ezagutzeko aukera izango dute izena eman duten umeek", dio Loidik.
Prozesua amaitu, proiektuak segi
PlazaBizi ekimena komunitatea erdigunean jarri duen herri-eredu bat garatzeko bi urteko prozesua izan da "herriak eta auzoak bizigarriagoak" egiteko. Loidik azaldu duenez, abenduan amaituko da esku-hartze zuzenen aroa baina horrek ez du esan nahi PlazaBizi orduan amaituko denik: "Kutxa Fundazioaren diru-laguntza bati esker haziak ereiten aritu gara azken bi urteotan, eta Santa Barbarako jaiak ere badu helburu lan hori erakustea. Espero dugu jarri ditugun hazi horiek fruituak ematea etorkizunean; PlazaBizi ez da abenduan amaituko, geratzeko etorri den dinamika bat da". Arimazubi eta ingurua aukeratu zen lanketarako, trantsizioko gune esanguratsua delako eta bertako auzotarrek zein eragileek interesa eta parte-hartzeko borondatea agertu zutelako. Gainera, azaldu dutenez, etorkizunean beste auzo edo herrietara esportatu daitekeen ekimena edo esperientzia da.