Helburua zaintzaren eta etxeko lanen esparruan egon daitezkeen indarkeria egoerak identifikatzeko eta horiei aurre egiteko gakoak eskaintzea da; urriaren 23an izango da saioa Iturriotz kaleko 21. zenbakian –Grupo SSIren egoitzan–, 16:00etatik 17:30era. Urriaren 23ko topaketa horretan izena emateko edo informazio gehiago jasotzeko, Judit Garciarekin jarri behar da harremanetan, 747 42 58 56 telefono zenbakira deituta.
Zainsare egitasmoa
Arrasateko Udalak, Eusko Jaurlaritzako Ekonomia, Lan eta Enplegu Sailaren laguntzarekin, ZainSare Gunea jarri zuen abian pasa den urtean modu esperimentalean. Udalaren baliabide berri horrek informazioa, orientazioa eta laguntza eskaintzen die etxeko eta zaintzako langileak kontratatzen dituzten edo kontratatu nahi dituzten pertsonei, baita sektorean lan egiten duten edo lan egin nahi duten langileei ere.
Zerbitzuen artean, kontratazioei buruzko aholkularitza, eskura dauden baliabideen inguruko informazioa, eskubide eta betebeharren inguruko orientazioa eta etxeko eta zaintzako langileen eta enplegatzaileen arteko eskaintza-eskariaren arteko lotura daude. Programa honen helburua zaintza-lanak balioan jartzea da, baita zaintzako langileak zaindu eta babesa ematea ere.