Tripaki usaina eta giro ederra izan dira nagusi zapatu arratsaldean Arrasateko Seber Altube plazan. Euriak ez ditu herritarrak kikildu, eta ugari izan dira Gipuzkoako IV. Tripaki Lehiaketara gerturatu direnak, tripakiak doan dastatzeko. Bi txapelketa jokatu dira: harategiena, laugarren aldiz, eta taberna zein jatetxeena, bigarrenez. Aurten, Arrasateko Otamendi harategiak eta Elgetako Haizea tabernak jantzi dituzte txapelak.
Txapela, 41 urteren ostean
Harategien kategorian, Joxe Ramon Otamendik eskuratu du lehen saria, Arrasateko Otamendi harategiaren izenean. 41 urte daramatza lanbidean, eta eskertuta agertu da txapela jasotzean, bere ibilbide luzeari egindako aitortza dela nabarmenduta. Tripaki onak prestatzeko sekretuaz galdetuta, produktua "ondo garbitzea" eta "behar bezala egostea" ezinbestekoak direla azaldu du.
Bigarren postua Manoli Tenarentzat izan da, Arrasateko Saburdi harategikoa; hirugarrena, berriz, Ibarrako Tolosa harategiarentzat.
Haizea tabernak txapelari eutsi dio
Ostalarien kategorian, Elgetako Haizea tabernak iazko garaipena errepikatu du. Bittor Gallastegik bigarren urtez jarraian eraman du txapela Elgetara, eta pozik agertu da lortutako emaitzarekin.
Gallastegiren esanetan, pazientzia eta mimoa dira tripaki onak prestatzeko gako nagusiak. Egoste denbora eta pikantearen puntua ondo harrapatzeari ere garrantzia eman dio. Urteetako jardunarekin eta behin eta berriz prestatuta, errezetari norberaren puntua aurkitzen zaiola azaldu du. Herritarren aldetik jasotako erantzuna ere nabarmendu du, askok tripakiak oso onak zeudela esan baitiote.
Bigarren postua Arrasateko Ezkina tabernarentzat izan da, eta, hirugarrena, Azkoitiko Latz tabernarentzat.
Gero eta parte hartze handiagoa
Lehiaketak laugarren edizioa bete du aurten, eta Arrasateko egutegi gastronomikoan sendotzen ari den hitzordua dela erakutsi du. Dendartean elkarteko teknikari eta antolatzaile Lander Alberdik azaldu duenez, "urtetik urtera gero eta parte hartze handiagoa" izaten ari da.
Tripakiak, arratsaldea goxatzeko
Arrasateko Udalak, Ederto-Harakel Gipuzkoako Harakinen Elkarteak eta Dendarteanek antolatu dute aurtengo hitzordua. Eguraldi euritsua gorabehera, herritar ugari ibili dira arratsalde osoan Seber Altube plazan, lehiakideen tripakiak dastatzen. Hala, tripaki plater beroek goxatu dute zapatuko arratsalde euritsua.