Arrasate Eskubaloik Txingudi hartuko du zapatuan Iturripen (18:00)

Aurkariaz galdetuta, honako hau dio taldeko kapitain Eki Letona Erretolatzak: "Aurreko denboraldian, etxean irabazi eta kanpoan galdu egin genuen. Jokalari asko aldatu dituzte, eta ez dakigu asko igarriko den jokoan. Baina kostaldeko taldea izanik eta iazkoa gogoan, talde azkarra izango da, seguruenik, kontraerasoak baliatuko dituena". Orain arte, bi garaipen eta bi porrot batuta, bosgarren jardunaldia izango dute arrasatearrek. "Azken urteetako hasierarik onena da, baina gehiago nahi dugu. Porrot mingarria izan genuen duela bi aste Iturripen, Zarautzen aurka. Oso ondo ari gara erasoan, inoiz baino gol gehiago egiten, baina defentsan hobetu egin behar dugu. Zapatuan gogorrak izan beharko dugu defentsan, bi puntuak etxean gera daitezen", adierazi du Letonak.