Denboraldiko etxeko lehenengo partidua jokatu du Ointxek, eta aurten sailkapenaren erdialdean egote hutsarekin ez direla konformatuko erakutsi dute David Peñarenek. Lehenengo bi laurdenetan partida oso parekatua izan da, eta arrasatearrak markagailuan atzetik iritsi dira atsedenaldira (54-56). Aldageletatik bueltan, baina, defentsan estutu eta hainbat hiruko saskiratu ostean lortu dute markagailuan 10 punturen bueltako errenta lortzea. Hala ere, aurrean izan duten taldea ez da nolanahikoa izan (iaz bigarren postuan bukatu zuen Ibaizabalek), eta hamar puntu inguruko errenta bi puntura jaistea lortu dute bizkaitarrek behin baino gehiagotan. Azkenean, momentu erabakigarrienetan fin ibili dira Ointxekoak, eta larritasun handirik igaro gabe lortu dute garaipena etxean gelditzea.
Helburu anbiziotsua
Lehenengo jardunaldian Xerezen irabazi eta gero, bigarren garaipena erdietsi du Ointxek Ibaizabalen aurka. Taldeko jokalari Iratxe Perezek adierazi du etxeko partidak irabaztea "oso garrantzitsua" dela eurentzat eta Ibaizabalen aurkako garaipena "azken hilabeteetan egindako egunerokotasuneko lan onaren emaitza" izan dela. Gainera, klubak aurten "apustu handia" egin duela onartu du, eta helburua "ahalik eta garaipen gehien lortzea" izango dela dio, sailkapeneko goiko postuengatik borrokan ibiltzeko.