Aikidoa, judoa, karatea, saskibaloia, eskubaloia, txirrindularitza, futbola, atletismoa, xakea, pilota... eta beste hainbat kirol diziplina ezberdin gertutik ezagutzeko aukera izan dute gaurkoan arrasatearrek, Kirola Herrira ekimenaren bitartez. Gaurkoan Iturripen batu dira herriko kirol talde ezberdinak euren jarduna erakusteko asmoarekin. Izan ere, kirol gune berria egin aurretik, Iturriperi agur esateko modua ere izan da, herriko talde guztiak bertan batu baitira.
Kirola ohiko kantxa zein esparruetatik ateratzea da ekimenaren helburuetako bat, eta horregatik, adibidez, tatami erraldoi bat jarri dute Iturripeko frontoi baten. Arrasate Atletiko taldekoek ere, Mojategi utzi eta Iturripeko pistan ibili dira korrikan, ARTko eta Mondrako kideekin batera.