Lurraldeko espazio berezietan, musika elektronikoa, ondarea, paisaia eta komunitatea konektatzea ditu helburu Dantz Point jaialdiak. Lurraldeko bost gune hautatu dituzte aurten eta horien artean dago Monterron parkea. Hala adierazi dute antolatzaileek: "2025eko esperientziak eragin handia izan zuen udalerrian, euria egin bazuen ere; horregatik, 2026an espazioa errepikatuko da, bere zabaltasuna, hirigunearekiko lotura zuzena eta formatura egokitzeko duen gaitasuna baliatuz".
Debagoieneko DJak izango dira protagonista bertan: I’MA, Joe Pieman, Carrik eta An2an. Eta haiekin batera Fefu arituko da, Dantz Point honetako Local Circuit by @bymavelpoint ekimenaren irabazlea.
Etenik gabeko musika saioa egingo dute horiek, 18:00etan hasi eta 03:00ak bitartean: "Elkartzeko, dantzatzeko eta eszena elektronikoa espazio eta komunitate berriekin konektatzen jarraitzeko". Sarrera debalde izango da.
Ekimena Gipuzkoako Foru Aldundiak, Laboral Kutxarekin batera, bultzatutako proiektua da, Keler eta Arrasateko Udalaren laguntzarekin.