Mondrak eta Anaitasunak jokatuko dute oraingo zapatuan, hilak 5, Arrasate Hiria torneoa (16:30, Mojategi). Jorge Davilaren mutilek Anaitasuna izango dute aurrean, joan den denboraldian ligan bigarren geratu zen taldea. Kontrario gogorra izango da, baina aproposa, bergararren kontrako derbira begira prestaketa lanekin jarraitzeko.
Izan ere, Ohorezko erregionaleko gainontzeko taldeak moduan zuri-moreak aurre-denboraldian murgilduta dabiltza. Abuztuaren 29an, esaterako, zaleek etxeko taldea Irubaten eta Sanprudentzioren kontrako hiruko torneoan ikusi ahal izan zuten. Bertan, Mondrak 0-0 berdindu zuen Irubaten kontra, eta 4-1 hartu zuten mendean Sanprudentzio.
Taldea indartzeko lanetan
Gainera, taldea uztailetik hona fitxaketa berriak iragartzen joan da. Hala, azken urteotan etxetik kanpora ibili eta gero elastiko zuri-morea jantziko dute ostera ere Gorka Menak, Iker Zubillagak eta Adiran Fernandezek. Eta, klubetik iragarri dute, besteak beste, Markel Perezek eta Julen Letonak harrobitik gora egingo dutela.